🌱 Президенттік олимпиададағы қос жеңіс: мектеп зияткерлері алтын мен күміс медаль иеленді

Елордадағы физика-математика бағытындағы Назарбаев Зияткерлік мектебінің оқушылары Мирас Әбдіман мен Альберт Ким Президенттік олимпиадада жоғары нәтижеге қол жеткізіп, жүлдегер атанды. Мирас алтын медальді қанжығасына байласа, Альберт күміс медаль жеңіп алды.

Президенттік олимпиада – еліміздің үздік оқушыларының жаратылыстану-математика бағытындағы білімдерін сынайтын беделді республикалық сайыс. Биылғы олимпиадаға Қазақстанның әр өңірінен 190 оқушы қатысып, білімдері мен біліктілігін дәлелдеді.

Олимпиаданың қорытындысы бойынша 10 Назарбаев Зияткерлік мектебінің оқушылары жүлделі орындарға ие болды. Олардың қатарында елордалық зияткерлердің екі медаль жеңіп алуы – мектептің жоғары білім деңгейін тағы бір мәрте айқындап берді.

Президенттік олимпиада алғаш рет 2008 жылы ұйымдастырылып, бүгінгі күнге дейін жас таланттарды қолдау алаңы ретінде танымал.