Бүгінгі таңда балалардың эмоционалды интеллект деңгейінің жоғары болуы маңызды. Балалардың психологиялық көңіл күйлері оң болуы, сабқтарын жақсы оқуға әсер етеді. Ал, оның бірден бір қолайлы ортасы ол – отбасы. Отбасы-адамның жаны тыныштық тауып, рахатқа бөленетін, бойға қуат, ойға шуақ алатын құтты мекені. Ол имандылықтың ұясы, өзара келісім мен сүйіспеншіліктің тұрағы. Отбасы – үлкен тәрбие мектебі болғандықтан, «9 «А» сынып оқушыларының эмоционалды интеллект деңгейін заманауи жанұя идеясы арқылы қалай көтеруге болады?» тақырыбындағы кіші зерттеу жұмысымызды «Өзін-өзі тану» пәнімен тәрбие сағатын кіріктіре отырып, ата-аналар мен оқушылардың қатысуымен өткіздік. Бұл сабақтың негізгі мақсаты оқушылар мен ата-аналарды бірлесе жұпта, топта жұмыс жасау арқылы бақытты отбасының ерекшеліктерін ұғынуға, қызығушылықтарын арттыруға, мектеп пен ата-ана байланысын нығайтуға тәрбиелеу болды. Сабақ барысында жағымды психологиялық үйлесімді орта қалыптастыру арқылы ата-ана мен баланың арасындағы қарым-қатынас мәселелерін байқауға ой салып, оны бірлесе шешу жолдары ұсынылды. Сабақта шаттық шеңбері «Афирмация», «Тосын сый» хаты, «Мен үшін ата-анамның рөлі қандай?» атты бейне ролик пайдаланылды. Топтық жұмыстар мәдениетті қарым-қатынас қалыптастыруда заманауи отбасы дәстүрінің маңыздылығы туралы ойландыруға және ұсыныстар жасауға көмектесті. Нәтижесінде ата-аналар мен оқушылар отбасылық құндылықтың маңыздылығын түсіне отырып, қарым-қатынасты нығайту, эмоционалды интеллект деңгейін жоғарылату үшін бірлесе заманауи отбасылық дәстүрлер өткізу керек екендігін түсінді.
Н.Сұлтаева,
Педагог-ұйымдастырушы куратор
К.Найманова,
Өзін-өзі тану мұғалімі.